متأمِّل الّكونْ عاشْ الّعُمرْ فِيْ دَهْشّهْ
فِكْرهْ تِشلّهْ وتِدّيْ هاجسهْ فِكْرهْ
 

حتّى تساوىْ قِماطَهْ مِثّلما نَعْشّهْ
واْصبحْ غيابهْ عَلامهْ لا طرَى ذِكْرهْ
 

وكلّما حارّ حرفهْ هزّتهْ رعْشّهْ
مِنْ مسّ غَيْبيْ وغيبْ المعرفهْ نَكْرهْ
 

تِتْرتّبْ اْفكارْ قَلْبهْ لا وقِعْ رَبْشّهْ
وتُغْدرهْ بنْت بقّعا لا أمِنْ مَكْرهْ
 

مِنْ سابل اْلحُبّ قَلْبهْ ماشّرِبْ طَشّهْ
ويستويْ قَدْرْ مَنْ حَبّهْ ومَنْ يكْرهْ
 

عاطِّرْ حديثهْ مبعّثرْ في صّدىْ نَقْشّهْ
وصمتَهْ اقْوَلْ وصمتْ القَولْ في حِكْرهْ
 

الشمسْ عيْنهْ وأرّضهْ في جُبَىْ رِمْشّهْ
والبحرْ سابِعْ عِيالهْ والفضّا وَكْرهْ
 

وعينْ زمزّمْ براسهْ جاتْ مِنْ فَقْشّهْ
صافيْ وجوهرْ زّلالهْ مِنْ دِمَا سُكْرهْ
 

يِطْعِمْ جميع الخلايقْ مِنْ حَشّا مِشّهْ
ويْقيسْ فرّهْ بدِقّهْ مِنْ خُطَى كَرّهْ
 

حالِبْ دَوامِيغْ عَقْلهْ والفِكَرْ رِهْشّهْ
ينّهَزْ رّغَاها ويجّلِيْ ذِيْ قديْ عَكْرهْ
 

ياكُلْ لُحومْ السّما وِانّ صامْ لَهْ نَهْشّهْ
تِنْزِلْ بحمْدهْ وتُرفَعْ لاصّدحْ شُكْرهْ
 

الّكَونْ مَحْمولْ نامُوسهْ على قَشّهْ
وَلا قَصَمْ ظهْرْ مَنْيوقهْ وَلا بَكْرهْ
 

مِنْ قادِم اقدَمْ قديمهْ والقروْنْ هَشّهْ
خطّطْ ليومهْ وعارفْ ما يقعْ بُكْرهْ
 

لَوْ كانْ ضحّى بعبْدهْ واصّطفَى كَبْشّهْ !
ما خرّ ساجِدْ وَلا اْبليسَكْ لِقِيْ هَكْرهْ