- في مهرجان البلدة ..
- ايوه سمعنابه ،امس افتتحه المحافظ مع مجموعة من الشخصيات والأعيان الحضارم .
بعدين جماعة الاعلاميين حقنا ماقصروا ، خلو الصور تمطر على الفيس .
- كان افتتاح على مستوى ياخي ، شىء مشرف يارجال ..
- إلا بقولك .. ذلحين صدق المحافظ اعتمد " مائة مليون " للمهرجان !
- إلا واه .. نحن الحضارم تعرفنا كيف لمن نفرح ،بنحب نفرح ببذخ ،حتى لمن نحزن بنحزن ببذخ .
بعدين لازم نظهر قدام الناس بشكل مشرف ،وبنسوي فعاليات وحفلات ،و على خزى كل حاسد وشاني.
 

بنروي العالم كيف حضرموت بخير ،وآمنه والمحافظ والبحسني ماقصروا خلو كل دجاجة على مرعاضها .
- ذلحين انته تشوفه هوذا ريض .. هوذا وقت الكشخات .
لا الوضع ولا الوقت مناسب لكشخه كما هوذه .. عشان نروي الناس بأن حضرموت آمنه مافي داعي نكح مئة مليون ،ونخاطر بحياة الناس ونقدمهم كما النعاج للانتحاريين والمتربصين بنا في هذا الوقت.
- ككيه عوذ من الشيطان وخل النقه حقك .. خلنا نفرح ،لنا وقت طويل معاد فرحنا ولا رقصنا .. بالله عليك كم لك معاد حضرت شي مخدره في المكلا .
- أنا مع الفرح والرعشه ،لكن الوقت والوضع ماهو مناسب، وحق الملايين الي بيصرفونها ما انسرطت لي .
بعدين فيه حاجات اهم في ذا الوقت بالذات ..ليش مايصرفونها ع الشوارع المحفرة ،والبيارات الطافحة ،والله الكراسي والانارة الخربانه حق الخور مثلاً ، والادارات الحكومية الي عاد بعضها مقفل لحد اليوم والليلة ، و الجنود المساكين الي عادهم بلا رواتب .
- ذلحين واه بغيت بس ،خل اللحي الزايد حقك..ياخي هم السلطة وهم ادرى بالبلاد مني ومنك .
- والله شكلها إلا عمياء تخضب لمجنونه .. واحد منهم بغا بيسور البحر ، والثاني بيسوي مخادر بمئة مليون !