يــا لَـيْلْ.. بـاقِي مَـعِي كِـلْمَهْ
مُــمْـكِـنْ  تـِـوَقِّــفْ  ونِـتْـكَـلَّمْ؟

.
يــا لَـيْـلْ  لَـيـتَ الـوَطَنْ  نَـجمَه
شَـعْـمَلْ عِـظامِي لـهَا  سُـلَّمْ
.
أو لَــيـتْ هــذا الـقَـمَرْ  لُـقـمَه
بَــيـنَ الـمَـسَـاكِينْ  تِـتْـقَـسَّمْ
.
أو لَــيـتْ  قـلـبـي بــلا  رَحـمَـه
يــقـدِر يَـــرَى الــنـاسْ  تـتْـأَلَّمْ
.
يــا لَـيـلْ.. يــا جـارحَ  الـنّسمَه
الــرُّوحْ فِــي ظُـلْـمَتَكْ و الـدَّمْ
.
سَاكِتْ.. و فِي سَكْتَتَكْ  حُرْمَه
تــفْـتِـشْ  جــراحِـي  وتـتْـلَـثَّمْ
******************
يـا شَعبْ.. باقِي مَعِي حِكمَه
يُـمـكِـنْ  مَــعَ  الـوَقـتْ  تـتْـفَهَّمْ
.
أرجُــوووكْ  لا  تَـدخُلَ الـقِسمَه
مَــن جَــرَّبَ  الـسُّـم  يـتْـسَمَّمْ
.
و الـصَّـبرْ عِـنـدَ  الـعَـرَبْ  نِـقمَه
حـــاوِلْ  مَـــعَ  الـصّـبـرْ  تـتْـظَلَّمْ
.
سـاكِتْ.. و هَجمَهْ  وَرَا  هَجمَه
و الــوَضــعْ  مــــا زالْ  يــتْــأَزَّمْ
.
أصـحَـابَـنَـا  غَــيَّــرُوا  الـنَّـغـمَـه
و اسـتَسلَمُوا  يَـومْ  مـا  سَلَّمْ !
.
هُـــمْ  حَــوَّلُـوا  ثَــورَتَـكْ  أَزمَـــه
وَقَّـــــعْ  لـــهــذا, وذا  بَــصَّــمْ
.
واتـقَـاسَمُوا الأرضْ و الـنِّـعمَه
بَـعـدَ الـقَـطِيعَه و طُــولَ الـذَّمْ
.
لَـطْـمَـهْ.. ومــا مِـثـلَهَا  لَـطـمَهْ
لَــــو مِـــن مَـآسِـيـكْ   تـتْـعَـلَّمْ
******************
بـاقِـي مَـعِي يـا وَطَـنْ   كِـلمَه
لَــــو يَــــومْ  فَــكَّـرْتْ   تـتْـقَـدَّمْ
.
قُــلْ لـلسَّرَقْ خَـفِّفُوا الـزَّحمَه
خَــلُّــوا الـمَـطـاحِـين تـتْـنَـعَّمْ
.
الـنِّصْفْ   شَـاقِي على الطُّغمَه
و الــنِّـصـفْ   بـالـجُـوعْ  يـتْـحَـزَّمْ
.
لا بُـــدّْ يـــا مَـوطِـنَ   الـحِـكمَه
تـضرِبْ  عَـلى كَـفّْ   مَـن هَـدَّمْ
.
و اللهْ   لَــــو يــــزْرَطَ   الـخِـتـمَـه
أو بــالــســمـاواتْ   يــتْــعَـمَّـمْ
.
لا بُـــــد  يـتْـحَـمَّـلَ الــصَّـدمَـه
مِـــن  كُـــل  ضـانِـكْ، ويـتـنَدَّمْ
.
و الآنْ   يــا مَـوطِـنِي.. خِـدْمَه؟
لَــيـتَـكْ   تُــسَـلِّـمْ   وتـتْـبَـسَّـمْ
.
اللهْ  لا يــجــعَــلَــكْ   تُـــهــمَــه
نُــجــلَـدْ  عَــلَـيـهـا  ونـتْـلَـطَّـمْ